Festival Internacional do Mundo Celta

O Festival Internacional do Mundo Celta de Ortigueira, coñecido tamén como Festival de Ortigueira, é un festival anual de balde de música tradicional folk das nacións celtas, fundado en 1978 polo persoal da Escola de gaitas de Ortigueira. Normalmente celebrase na segunda fin de semana de xullo na vila de Ortigueira. No 2003 foi declarado festa de interese turístico nacional, e no 2005 foi declarado festa de interese turístico internacional. En 2022 recibiu o Premio Martín Códax da Música. Ó longo da súa historia pasaron polos seus escenarios os grupos e intérpretes máis significativos da música celta, así como da música popular e tradicional de Galicia e do noroeste de España. O escenario principal sitúase no porto, con actuacións de grupos de gran nivel e fama internacional. Dende a edición do 2000 ata o 2010, nos arredores do porto situábase un escenario menor no que se daban cita grupos noveis, chamado Proxecto Runas, cuxo gañador obtiña un premio económico e unha praza para actuar no escenario principal da edición do seguinte ano. Na actualidade o proxecto de novos grupos ten lugar no escenario principal na noite do xoves. Na praia de Morouzos e no piñeiral habilítase o espazo para que acampe a xente que acode ao festival. No 2020, a causa da pandemia do COVID-19, víronse obrigados suspendelo. En 2021, por mor dunha nova onda da pandemia, tamén se pospuxo, co anuncio de que o festival do 2022 sería o máis longo da historia, con oito días de duración.

Wikipedia-Text auf Galicisch, lizenziert unter CC BY-SA. Vollständigen Artikel lesen ↗