Calsoa

A praia da Calzoa ou praia das Barcas é unha praia galega localizada no municipio de Vigo, na provincia de Pontevedra. Trátase dunha praia semiurbana cunha extensión de 175 metros.

Localización e acceso

Está localizada na parroquia viguesa de Coruxo, concretamente na beira esquerda da desembocadura do río Lagares. Un afloramento rochoso marca o límite coa praia da Foz. Desde a praia de Samil pode tomarse a PO-324 en dirección a Canido para chegar á praia de Calzoa, onde existe acceso peonil e aparcadoiros habilitados. A liña L10 de Vitrasa ten unha parada próxima a este areal. No ano 2025 realizáronse obras de mellora da accesibilidade na contorna da praia da Calzoa.

Descrición

Trátase dunha pequena praia de area fina branca con tonalidade crema. No areal pode encontrarse un tipo de embarcacións tradicionais de pesca, as gamelas coruxeiras, que forman parte do patrimonio cultural desta zona. A praia da Calzoa está catalogada como área de esparexemento canino. O uso canino da praia e a súa limpeza con maquinaria pesada teñen recibido críticas por parte de grupos ecoloxistas, que consideran que estas actividades supoñen un risco medioambiental.

Outros artigos

Coruxo Río Lagares Praia de Samil Praia do Vao

Wikipedia text in Galician, licensed CC BY-SA. Read the full article ↗