Pazo de Castro Monteagudo

O Pazo de Castro Monteagudo, é un pazo barroco do século XVIII situado na rúa Pasantería, xunto á Praza da Leña da cidade de Pontevedra, en pleno casco antigo. == Historia == O pazo de Castro Monteagudo construíuse en 1760, como indica un documento en latín atopado durante a súa reforma. O seu promotor e propietario foi José de Castro Monteagudo, primeiro interventor da provincia marítima de Pontevedra. Máis adiante, a escola masculina instalouse no piso superior, e a tenda La Imperial, o restaurante La Flor e un taller de carpintería situáronse no piso inferior. En 1928, o Museo de Pontevedra comprouno ao seu propietario Casimiro Gómez Cobas por 52.000 pesetas para instalar o museo. Este pazo converteuse na súa primeira sede. Castelao, mecenas fundador do museo, participou nas ideas para a súa remodelación e adaptación para converterse en museo: debuxou varios deseños para a distribución interior e para o balcón superior, que aínda se conservan. O edificio abriuse ao público como museo o 10 de agosto de 1929. As obras de ampliación do pazo comezaron en abril de 1936. A parte co arco que o conecta co pazo de García Flórez engadiuse en 1943, segundo o proxecto do arquitecto Robustiano Fernández Cochón, que tamén se encargou de incorporar unha torre ao pazo. == Descrición == Este pazo urbano ten unha fachada principal na rúa Pasantería de características austeras, con dúas fiestras e unha porta central con balcón na planta superior e unha porta de entrada no centro e outras dúas ventás na planta baixa. Na fachada sur destaca un balcón sostido por grandes modillóns sobre os que hai tres columnas de pedra que sosteñen o tellado. Ao final desta fachada, o pazo ten unha torre con varias xanelas e un balcón que foi engadido no século XX, así como un escudo de pedra de Pontevedra. Na fachada que dá ao xardín interior tamén se pode ver o escudo de Pontevedra. O pazo ten 739 metros cadrados de superficie construída. O edificio alberga coleccións de arqueoloxía, ourivaría prerromana e romana e pintura gótica, renacentista e barroca española, italiana e flamenga dos séculos XV ao XVIII. Expóñense cadros de Pedro Berruguete, Juan Correa de Vivar, Eugenio Cajés e Juan Pantoja de la Cruz, entre outros. Tras a súa reforma aprobada en 2022 os espazos interiores serán diáfanos e libres de obstáculos, quedando só as paredes mestras orixinais que lle darán un aspecto unificado. O pazo terá tamén unha ancha conexión subterránea co pazo de García Flórez. == Galería == == Notas == == Véxase tamén == === Bibliografía === Aganzo, Carlos (2010). Pontevedra. Ciudades con encanto (en castelán). Madrid: El País-Aguilar. p. 54-55. ISBN 978-8403509344. Fontoira Surís, Rafael (2009). Pontevedra monumental (en castelán). Pontevedra: Deputación de Pontevedra. p. 310-311. ISBN 978-84-8457-327-2. Riveiro Tobío, Elvira (2008). Descubrir Pontevedra (en castelán). Pontevedra: Edicións do Cumio. p. 61. ISBN 9788482890852. === Outros artigos === Museo de Pontevedra Pazo de García Flórez === Ligazóns externas === Edificio Castro Monteagudo do Museo de Pontevedra Pazo de Castro Monteagudo na web Turismo Rías Baixas Arquivado 14 de abril de 2021 en Wayback Machine.

Texto de Wikipedia en gallego, con licencia CC BY-SA. Ver el artículo completo ↗