Pedra das Tixolas

A Pedra das Tixolas ou Laxe das Tixolas é un conxunto de gravados rupestres da Idade do Bronce (1200 - 600 a. C.) situadas na parroquia de Abalo (Catoira).

Características

Os petróglifos atópanse na ladeira dun monte a 180 metros de altitude. Foron realizados nunha roca granítica elíptica de aproximadamente 4,5 metros de ancho cun amplo número de combinacións de círculos simples con liñas, o que lles dá o aspecto de tixolas e cazoletas no seu interior, en consonancia cos motivos abstractos recorrentes no estilo Atlántico de arte rupestre, maioritario en Galicia. Tamén se observan cruces e liñas, posiblemente medievais ou modernas e unha inscrición coa palabra «ballina». En total distínguense unhas vinte combinacións circulares e cruces, destacando unha delas cun pedestal de base.

Conservación

As características litolóxicas do soporte dos gravados favorece a súa conservación, con procesos de alteración lentos. Con todo, a acción humana afectou a súa permanencia ao actuar directamente sobre os paneis con actos de vandalismo, mediante extracción de pedra, obras de infraestruturas varias ou mediante a acción dos incendios forestais. A Pedra das Tixolas atópase alterada pola acción humana, ao realizarse extracción de pedra no lugar, que se utilizou como canteira. Tamén se advirten os sinais de incendios na zona que deixaron manchas sobre a roca, aínda que non se produciron perdas ou desprendementos da superficie. En 2023, a partir dunha subvención de 5.916,90 € achegada pola Deputación Provincial de Pontevedra, rozouse a área e sinalizáronse os accesos ao xacemento.

Testo di Wikipedia in galiziano, con licenza CC BY-SA. Leggi l'articolo completo ↗