Aquis Querquennis

Aquis Querquennis, ou Aquae Querquennae, coñecido popularmente como A Cidá, é un complexo arqueolóxico constituído por un campamento romano e unha mansión viaria, situado na parroquia dos Baños (Bande). O campamento estableceuse no lugar para a construción da Vía XVIII ou Vía Nova, calzada que comunicaba Bracara Augusta e Asturica Augusta. Estivo ocupado entre o último cuarto do século I e a década de 120. A mansión viaria era unha hospedaxe de viaxeiros na citada calzada, ocupada nos séculos II e III. No mes de setembro do ano 2018 foi declarado Ben de Interese Cultural. Atravesa o lugar unha ruta de peregrinación a Santiago de Compostela, coñecida como Ruta da Raíña Santa, nome debido á peregrinación realizada por Sabela de Portugal, no século XIV e seguida nos séculos posteriores por numerosos camiñantes. Tal ruta coincide coa citada calzada romana Vía Nova no seu tramo inicial ata Bande e está a ser reivindicada como "camiño xacobeo" por diversas asociacións da comarca. No lugar atópase o moderno Centro de Interpretación Aquae Querquennae-Vía Nova, que alberga un museo e varias salas explicativas do complexo arqueolóxico.

위키백과 갈리시아어 문서, CC BY-SA 라이선스. 전체 문서 읽기 ↗