Castro de San Lourenzo

O castro de San Lourenzo é un poboado fortificado situado en Cereixa (A Pobra do Brollón). == Historia == O recinto naceu como poboado fortificado na Idade de Ferro. Sitúase nun outeiro a carón do río Saa, e abrangue unha extensión duns 8800 m². Funcionou como centro metalúrxico. Na Idade Media comezou a usarse como necrópole e posteriormente construíuse unha capela, dedicada ao mártir Lourenzo. Aparece xa documentado como castro de San Lourenzo nun apeo de 1595. O templo ampliouse no século XVII, e tras o seu abandono rehabilitouse en 1875. Abandonouse de novo e diversas pedras, como o lintel da porta principal ou partes dunha columna, foron reutilizadas en casas da contorna. Nas décadas de 1960 e 1970 levouse a cabo no exterior do recinto unha explotación de grava e area. == Campañas arqueolóxicas == En 2016 comezaron a desenvolverse as escavacións arqueolóxicas, baixo dirección técnica de Xurxo Ayán, organizadas a través da asociación veciñal María Castaña. Realízanse campañas de forma anual co apoio do Concello da Pobra do Brollón e dun campo de traballo da Dirección Xeral de Xuventude e Voluntariado da Xunta de Galicia. Escaváronse varias cabanas e documentáronse máis de 80 tumbas da necrópole –orientadas de oeste a leste e tapadas con lousa–, en seis das cales se atoparon restos óseos. No recinto atopáronse pezas de cerámica da Idade de Ferro, varias moedas medievais e da Idade Moderna, un obxecto litúrxico de bronce e diverso enxoval funerario como dentes de animais, lousiñas furadas, escouras de ferro, un coitelo e un pasador. En 2022 apareceu un colar con 23 doas. A campaña de 2026 estivo dirixida por Claudia González Villadóniga. Cada ano, no marco da escavación arqueolóxica celébrase a romaría de San Lourenzo o día 10 de agosto. Ademais, en 2026 realizouse unha actividade coincidindo coa eclipse solar do 12 de agosto de 2026, coa presenza da astrofísica Iria Ayán e das escritoras Olga Novo, Mario Obrero -colaborador habitual nas escavacións- e Andrea Nunes Brións. == Notas == == Véxase tamén == === Bibliografía === Ayán Vila, Xurxo (2021). San Lourenzo ven a nós. Memorias dun castro galego. María Castaña. Martínez Martínez, María de los Ángeles (1996). "Castro de Cereixa Pobra do Brollón)". Revista cultural Samoeiro.

Texto da Wikipedia en galego, con licenza CC BY-SA. Ver o artigo completo ↗