Porta do Sol

A porta do Sol é unha praza situada na cidade de Vigo. Recibe ese nome por estar localizada nunha das sete portas de entrada á antiga cidade amurallada, concretamenta á orientada cara o nacemento do Sol. A porta do Sol é unha praza peonil, lixeiramente inclinada cara o leste, e que comunica coa praza da Constitución, a praza da Princesa e as rúas Príncipe, Policarpo Sanz, Elduayen, Doutor Cadaval, Segunda República e Carral. A praza é un lugar icónico da cidade. Foi testemuña de grandes acontecementos de interese que tiveron lugar en Vigo, como a inauguración do alumeado de gas en 1789 ou as sepulturas de Ricardo Mella e Xosé García Barbón. Na praza tamén se proclamou na cidade a Segunda República. É lugar de celebración de actos e concertos. Nela celébrase anualmente o acto de inauguración do alumeado de Nadal. A porta do Sol é considerada o quilómetro cero da cidade.

Historia

A porta do Sol recibe dito nome por ser o lugar onde se localizaba unha das sete entradas ou "portas" da cidade, cando esta permanecía amurallada antes do seu derribamento definitivo en 1862. O nome de "porta do Sol" vén da orientación de dita entrada cara o leste, onde nacía o Sol. O recinto amurallado foi construído no ano 1656 e financiado pola cidadanía viguesa e o rei Filipe IV. A muralla contaba con sete portas de entrada distribuídas por toda a muralla.

Primeira remodelación

A finais do século XIX, realizouse unha primeira remodelación coa creación dun novo vial que conectase a porta do Sol co paseo de Afonso sen ter que arrodear a praza da Constitución anexa. Así, esta actuación permitiu converter unha rúa nun conato da praza que é na actualidade. Dita actuación foi liderada polo alcalde que daquela gobernaba a cidade, Manuel Bárcena Franco.

O Sereo

A escultura do Sereo é unha figura antropomorfa do escultor cambadés Francisco Leiro no ano 1991. Eríxese no centro da praza e ten unha altura de 11 metros. O nome que o autor lle puxo a obra é Home Peixe. É unha escultura que está influenciada polo León de San Marcos de Venecia.

Segunda remodelación

Unha segunda remodelación máis contemporánea permitiu a practicamente completa peonalización da praza. Dita actuación aínda está a completarse,[cando?] e inclúe un túnel que comunica a rúa de Policarpo Sanz con Torrecedeira.

Edificios singulares

Edificio El Moderno Edificio Pardo Labarta Edificio Simeón, un dos principais baluartes do modernismo vigués e influenciado pola arquitectura do francés Gustave Eiffel. O arquitecto do edificio é Michel Pacewicz. O Sereo, escultura do galego Francisco Leiro. Edificio Banco de Vigo, que posteriormente pertenceu ao Banco Pastor e ao Santander. Construído no ano 1923 e deseñado por Manuel Gómez Román.

Galería de imaxes

Outros artigos

O Sereo Francisco Leiro

维基百科加利西亚语词条，采用 CC BY-SA 许可。 阅读完整条目 ↗