Incendios forestais en Galicia
Esta páxina amosa os focos de calor que os satélites da NASA detectaron sobre Galicia nas últimas 24 horas. Non é un parte oficial de incendios: é o que se ve desde o espazo, cos seus ocos e os seus atrasos, contado tal cal.
6focos de calor nas últimas 24 horas
Comprobado: 01/09, 01:22 · NASA FIRMS (VIIRS e MODIS), ficheiros abertos das últimas 24 h
| Onde | Detectado | Satélite |
|---|---|---|
| San Cibrao das Viñas · Ourense | 31/08, 15:23 | VIIRS S-NPP |
| Rubiá · Ourense | 31/08, 03:22 | VIIRS NOAA-21 |
| Rubiá · Ourense | 30/08, 04:36 | VIIRS NOAA-20 |
| A Coruña · A Coruña | 31/08, 04:17 | VIIRS NOAA-20 |
| A Coruña · A Coruña | 31/08, 05:02 | VIIRS NOAA-21 |
| A Coruña · A Coruña | 31/08, 03:58 | VIIRS S-NPP |
Velos no mapa
Os mesmos focos, pero sobre o terreo: acéndense na capa «focos de calor» do mapa de Galicia, e ao seu carón vense as aldeas, os montes, os ríos e o patrimonio que teñen preto. Cada foco leva a hora á que o viu o satélite. O mapa tamén trae a vista aérea de 1956, que serve para entender canto cambiou o monte que hoxe arde.
Que é un foco de calor (e que non é)
Un foco de calor é un punto onde un satélite mediu unha temperatura moito máis alta ca a do arredor. Iso adoita ser lume, pero non sempre: tamén o son unha queima agrícola autorizada, unha industria quente, un forno ou unha canteira. E ao revés, un lume pequeno baixo o arboredo pode non chegar a verse. Un foco NON é un incendio confirmado nin di canta superficie arde.
Estou vendo fume e aquí non aparece nada
É normal e pasa a miúdo. Entre que empeza o lume e que un satélite pasa por riba poden ir horas; se hai nubes ou fume espeso, non se ve; e os lumes pequenos ou baixo copas moitas veces non se detectan. Que non estea aquí non significa nada.
Se ves un lume
Chama ao 112 e dá a localización o máis exacta que poidas. Non te achegues, non intentes apagalo e non te fíes de que xa o avisou alguén.
De onde saen estes datos
Dos instrumentos VIIRS (satélites Suomi-NPP, NOAA-20 e NOAA-21) e MODIS, que a NASA publica en aberto no sistema FIRMS. Cada satélite pasa por Galicia unhas dúas veces ao día. Consúltanse as catro fontes, agrúpanse os puntos que caen na mesma cela de arredor de 400 metros —varios satélites poden ver o mesmo lume— e quédase o de maior potencia radiativa. Actualízase cada quince minutos.
Fonte dos datos: NASA FIRMS ↗
Preguntas
Hai incendios en Galicia agora mesmo?
Nesta páxina vense os focos de calor detectados por satélite nas últimas 24 horas. Non é un parte oficial: para saber se hai un incendio activo e en que estado está, hai que consultar as emerxencias da Xunta ou chamar ao 112.
Cada canto se actualiza?
Cada quince minutos, aínda que os datos novos só aparecen cando pasa un satélite, unhas dúas veces ao día por cada un dos catro.
Por que aparece un foco onde non hai ningún incendio?
Porque o satélite mide calor, non lume. Unha queima agrícola autorizada, unha industria, un forno de cal ou unha canteira poden dar un foco.
Podo usar isto para saber se debo evacuar?
Non. Chega tarde, non ve baixo as nubes e non sabe cara a onde avanza o lume. Para iso, 112.